Om Dødsårsaksregisteret
Dødsårsaksregisteret inneheld opplysningar om personar som på dødstidspunktet oppheld seg i Noreg, og personar som på dødstidspunktet er registrerte som busette i Noreg, men døyr i utlandet. Registeret dannar utgangspunkt for den årlege dødsårsaksstatistikken som Folkehelseinstituttet publiserer.
Publisert Oppdatert
Data frå Dødsårsaksregisteret blir publiserte i statistikkbankane ved Folkehelseinstituttet. Data frå Dødsårsaksregisteret blir vanlegvis frigitte rundt ti månader etter utgangen av året.
-
Statistikkbanken til Dødsårsaksregisteret - finn dødsårsaker fram til og med 2016.
-
Norgeshelsa statistikkbank - finn nøkkeltal om dødsårsaker, tilrettelagt for fylke, helseregionar og landet, data til og med 2015.
-
Kommunehelsa statistikkbank - finn nøkkeltal om dødsårsaker, tilrettelagt for kommunar. Data til og med 2015.
Dødsårsaksregisteret skal følgje med på utviklinga i dødelegheit
Føremålet med Dødsårsaksregisteret er å overvake dødsårsaker over tid. Ein kan for eksempel følgje med på utviklinga i dødelegheit for mellom anna hjarteinfarkt, kreft, ulykker og sjølvmord. Ved hjelp av data frå Dødsårsaksregisteret kan ein overvake helsetilstanden til folket, kvalitetssikre helsetenester og forske på årsaker til sjukdom.
Noreg er forplikta til å utarbeide offisiell dødsårsaksstatistikk. Alle dødsfall blir melde inn av lege, som fyller ut ei dødsmelding.
Organisasjonsendring
Folkehelseinstituttet (FHI) tok over som datahandsamar for Dødsårsaksregisteret 1. januar 2014. Før dette var det Statistisk sentralbyrå (SSB) som var datahandsamar, mens FHI var datahandsamingsansvarleg frå 2001. Organisatorisk er registeret no plassert i Divisjon for epidemiologi, avdeling for helseregister.
I samband med organisasjonsendringa har også historiske data blitt overførte frå Statistisk sentralbyrå til Folkehelseinstituttet. Ein har òg lagt ned mykje arbeid for å utvikle eit nytt IT-system som både kan handtere gamle data og handsame nye på ein effektiv måte.
Fagrådet for Dødsårsaksregisteret
Fagrådet er breitt samansett av fagpersonar som representerer ulike brukargrupper i Dødsårsaksregisteret: Sjukehus, allmenn- og sjukehusmedisin, andre helseregister, helsestyresmaktene og Legeforeningen.
Tilgang til data frå registeret
Forskarar og andre kan søkje om data frå Dødsårsaksregisteret.
- Søknad om data frå Dødsårsaksregisteret - rettleiing for forskarar og andre som søkjer om datatilgang
Dersom forskarar eller andre har spørsmål om datatilgang, kan dei kontakte Dødsårsaksregisteret på e-postadressa datatilgang@fhi.no ved FHI.