Dette vert registrert i Abortregisteret
Artikkel
|Sist endret
Alle krav om provosert abort skal meldast til Abortregisteret, inkludert både sjølvbestemde og nemndbehandla abortar. Registeret inneheld ikkje opplysningar om spontanabortar.
Helsepersonell som er knytt til verksemd der abort eller nemndbehandling vert utført, skal melde inn opplysningane.
Opplysningar som vert registrerte
- Avidentifiserte personopplysningar om den gravide, altså ingen direkte identifiserande opplysningar som namn eller fødselsnummer.
- Opplysningar om helseforholda til den gravide, krav om abort, eventuell nemndbehandling av kravet og medisinske opplysningar om aborten.
Registrering heimla i forskrift
Heimel for registrering av alle krav om abort i Abortregisteret finst i forskrifta for Abortregisteret.
Nokre abortar skal òg registrerast i Medisinsk fødselsregister (MFR). Heimel for denne registreringa finst i forskrift for MFR. Fram til og med 31. mai 2025 omfatta meldeplikta til MFR nemndbehandla abortar jf. abortlova av 1975 § 2 tredje ledd. Frå og med 1. juni gjeld meldeplikta til MFR nemndbehandla abortar jf. abortlova av 2024 § 3 andre ledd.
Frå 1. juni 2025 er det innført nokre overgangsløysingar for innmelding til Abortregisteret. Desse består av eigne nye meldingar frå abortnemndene, og endringar i rutinar for dokumentasjon og oversending av abortmelding frå klinikkane. Abortmeldinga frå klinikkane dannar framleis òg grunnlaget for registrering i MFR.
Permanent registrering i Abortregisteret skjer i avidentifisert form, altså utan personidentifiserande opplysningar, som namn og fødselsnummer.
Permanent registrering i MFR av abortar etter abortlova av 1975 § 2 tredje ledd bokstav c, samt abortar etter abortlova av 2024 § 3 andre ledd bokstavane c og i nokre tilfelle d, inkluderer i utgangspunktet direkte identifiserande opplysningar. Den gravide har likevel reservasjonsrett.
Permanent registrering i MFR av abortar etter abortlova av 1975 § 2 tredje ledd bokstavane a, b, d og e, samt abortar etter abortlova av 2024 § 3 andre ledd bokstavane a, b og i nokre tilfelle d, skal skje i avidentifisert form.
- Innmelding til Abortregisteret etter 1. juni 2025 - FHI
- Konsekvensar av ny abortlov for Medisinsk fødselsregister - FHI
Reservasjonsrett
- Abortar etter abortlova av 1975 § 2 tredje ledd bokstav c vert innvilga dersom «det er stor fare for at barnet kan få alvorlig sykdom, som følge av arvelige anlegg, sykdom eller skadelige påvirkninger under svangerskapet».
- Abortar etter abortlova av 2024 § 3 andre ledd bokstav c er tillatne dersom «det er sannsynlig at fosteret har en alvorlig tilstand, eller at fosteret vil dø under svangerskapet eller kort tid etter fødsel».
- Abortar etter abortlova av 2024 § 3 andre ledd bokstav d er tillatne dersom «medisinske forhold ved fosteret, forhold ved den gravide, den gravides livssituasjon eller en kombinasjon av disse gjør svangerskap, fødsel, barnets oppvekst eller fremtidig omsorg for barnet særlig krevende.».
For alle abortane lista over, kan permanent registrering av direkte personidentifiserande opplysningar i MFR berre skje dersom den gravide ikkje motset seg dette. For abortar tillatne etter abortlova av 2024 § 3 andre ledd bokstav d kan direkte personidentifiserande opplysningar berre registrerast dersom løyvet til abort er gitt heilt eller delvis på grunn av medisinske tilhøve ved fosteret.
Reservasjonsretten er heimla i forskrifta for MFR. Dersom den gravide nyttar seg av reservasjonsretten, skal permanent registrering av aborten òg i MFR skje i avidentifisert form.
I samband med utfylling av abortmeldinga for dei abortane nemnde over skal den gravide få informasjon om retten til å motsetje seg permanent lagring av personidentifiserande opplysningar i MFR. Eit eventuelt ynskje om reservasjon vert registrert i abortmeldinga.
Kan kontakte FHI om evt. sletting
Registrerte i Medisinsk fødselsregister som ikkje har fått informasjon om reservasjonsrett knytt til opplysningar skildra i førre avsnitt, og som ynskjer sine direkte personidentifiserande opplysningar sletta, kan nytte dette skjemaet: