Psykisk helse

Samordning av psykisk helse hos vaksne

Avdelinga har eit nasjonalt ansvar for å samordna kunnskap om psykisk helse hos vaksne. Det inkluderer å styrkja datagrunnlaget på psykisk plagar og lidingar, samordna analysar av psykiske helseplager hos vaksne i Noreg, identifisera sentrale risikofaktorar og skaffa kunnskap om førebyggjande tiltak.

Som del av samordningsansvaret har avdelinga etablert eit nasjonalt nettverk av forskarar og andre interessentar. Internasjonalt har avdelinga mellom anna samarbeid med World Mental Health Survey Initiativ og Harvard.

Livskvalitet

Å styrke kunnskapsgrunnlaget om livskvalitet er eit sentralt fokus ved FHI, og dette arbeidet er forankra i avdelinga. Me er særleg opptekne av sosial og geografisk forskjell i livskvalitet og korleis denne utviklar seg over tid. Me forskar også på årsaksfaktorar og årsaksmekanismar gjennom livsløpet, samtidig som me utviklar, gjennomfører og evaluerer livskvalitetsfremjande og sjukdomsførebyggjande tiltak. I satsinga tek me også sikte på å koordinera livskvalitetsfeltet og å vidareutvikla datagrunnlaget og målesystemet for livskvalitet i Noreg.

Avdelinga er involvert i fleire pågåande nasjonale og internasjonale prosjekt og samarbeid, inkludert forskingssenteret Promenta ved Psykologisk Institutt ved UiO.

Sjølvmord

Avdelingas forsking på sjølvmord baserer seg på store og komplekse registerkoplingar. Me har eit folkehelseperspektiv på sjølvmordsforsking. Me er særleg opptekne av sosiale risikofaktorar for sjølvmord, rolla til primærhelsetenesta i det sjølvmordsførebyggjande arbeidet, oppfølginga av etterlatne etter sjølvmord, og dessutan sjølvmord hos menn og i innvandrarbefolkninga. Forskinga har hovudfokus på å identifisera faktorar som på sikt kan vera nyttig for å utvikla folkehelsetiltak som kan verka sjølvmordsførebyggjande.

Avdelinga deltek i fleire spesifikke prosjekt relatert til sjølvmordsførebygging som å hjelpa Utdanningsdirektoratet med sjølvmordsførebygging i skulen, og Jernbaneverket med sjølvmordsførebygging ved jernbanen.

Psykisk helse blant innvandrarar

Avdelinga har eit særleg fokus på vaksne innvandrarars psykiske helse og bruk av helsetenester. Målet er å få meir kunnskap om grupper av innvandrarar som er spesielt utsette for psykisk plagar, om risiko- og vernefaktorar for, og konsekvensar av dårleg psykisk helse og dessutan barrierar for bruk av (psykisk)helsetenester.

Avdelinga har ei rekkje prosjekt med finansiering frå mellom anna Forskingsrådet.