Personvern og handsaming av personopplysningar i IPLOS-registeret
Artikkel
|Publisert
Korleis registeret handsamar, samlar inn, lagrar og leverer ut personopplysningar er nærare skildra i lovverket og forskriftene. Her finn du viktig informasjon om korleis personvernet ditt er teke vare på i IPLOS.
Handsaming av personopplysningar i IPLOS
Korleis registeret handsamar, samlar inn, lagrar, leverer ut og slettar personopplysningar er nærare skildra i lovverket og forskriftene, men vi har her samla viktig informasjon om korleis personvernet ditt er teke vare på i IPLOS. Reglane for bruken av personopplysningane er nærare skildra i Forskrift om pseudonymt register for individbasert helse- og omsorgsstatistikk (lovdata.no).
Formålet med handsaminga av personopplysningane dine i IPLOS
Formåla med handsaming av personopplysningar i IPLOS er spesifisert i forskrifta § 1-3:
- gi grunnlag for overvaking, kvalitetssikring, planlegging, utvikling og overordna styring av helse- og omsorgstenesta og helse- og omsorgsforvaltninga,
- gi grunnlag for forsking.
- utarbeiding av nasjonal, regional og lokal pleie- og omsorgsstatistikk
Rettsleg grunnlag for Folkehelseinstituttet si handsaming av opplysningar om deg i IPLOS
All handsaming av personopplysningar må ha eit rettsleg grunnlag for å vere lovleg. I personvernforordninga blir dette kalla behandlingsgrunnlag. Ei oversikt over behandlingsgrunnlag finn du i personvernforordninga (GDPR) artikkel 6. For handsaming av helseopplysningar må det i tillegg finnast eit grunnlag etter GDPR artikkel 9 nr. 2. Du finn lenkje til personvernforordninga under "lovgiving" heilt til slutt i personvernerklæringa.
Vårt behandlingsgrunnlag for handsaming av opplysningar i IPLOS er:
- GDPR artikkel 6 nr. 1 bokstav e) - handsaminga er naudsynt for å utføre ei oppgåve i allmenta si interesse eller utøve offentleg mynde som Folkehelseinstituttet er pålagd.
- GDPR artikkel 9 nr. 2 bokstav g) – handsaminga er naudsynt av omsyn til viktige allmenne interesser.
- Helseregisterlova § 9 bokstav b og IPLOS-forskrifta § 1-1, jf. § 1-5.
Kjeldene til opplysningane dine i IPLOS
Datagrunnlaget i IPLOS-registeret er innhenta frå følgjande kjelder:
- Helse- og omsorgstenestene i kommunane: Søker du om, eller får du helse- og omsorgstenester i kommunen din, blir det registrert opplysningar om deg og behova dine for hjelp. Desse opplysningane er ein del av journalen din og er konfidensielle. Berre dei som treng det i jobben sin skal ha tilgang til opplysningane, og dei har teieplikt. Nokre av desse opplysningane blir sende til IPLOS-registeret.
Kva slags opplysningar om deg finst i IPLOS?
Folkehelseinstituttet kan handsama pseudonymiserte opplysningar om deg, som til dømes:
- Bakgrunnsopplysningar (bustadkommune, tenesteytande kommune, bydel, distrikt, kjønn, fødselsår, sivilstand, dødsdato, behov for assistert kommunikasjon)
- Opplysningar av tyding for vurdering av tenestebehov (opplysningar om bustad og hushald og om personen får privat, ikkje betalt hjelp, funksjonsevne i daglege gjeremål, og andre opplysningar om helsetilstand og sjukdom som er relevante og naudsynte for å vurdere tenestebehovet, om og når personen er vurdert av lege eller tannhelsepersonell dei siste 12 månadene).
- Opplysningar om tenester (vedtak eller avgjerd om helse- og omsorgstenester, melding om skadeavverjande tiltak i naudssituasjonar og vedtak om bruk av tvang og makt, døgntilbod i institusjonar under spesialisthelsetenesta, opplysning om individuell plan).
At opplysningane er pseudonymiserte tyder at identiteten din (fødselsnummer) er bytta ut med eit tilfeldig løpenummer (pseudonym). Dette betyr at det er mogleg å følgje deg som person utan at identiteten din blir avslørt.
Kva blir opplysningane i IPLOS brukte til?
- Opplysningane i IPLOS kan brukast til å lage statistikk og analysar slik at nasjonale styresmakter og kommunen du bur i, kan få betre oversikt over helsetilstanden til innbyggjarane. Dette kan bidra til betre helsetenester, betre forståing for kva folk treng, og effektivisering av førebyggjande arbeid.
- Folkehelseinstituttet kan òg gjere personopplysningar i IPLOS-registeret tilgjengelege for andre, samt leggje til rette for og setje saman desse med opplysningar frå andre register, når dette er tillate etter gjeldande reglar.
Kven kan få utlevert opplysningar om deg frå IPLOS?
- Forskarar etter søknad: Folkehelseinstituttet kan gje tilgang til opplysningar som er naudsynte og relevante for gjennomføring av forskingsprosjekt.
- Nasjonale og kommunale styresmakter etter søknad, også dei regionale helseføretaka (RHF) og Folkehelseinstituttet.
- Internt i Folkehelseinstituttet etter søknad. Statistisk sentralbyrå, som forvaltar IPLOS, kan opplyse personopplysningane dine til andre avdelingar i Folkehelseinstituttet, når dette er naudsynt for å løyse ei oppgåve.
Utlevering av personopplysningane dine frå IPLOS skal berre skje etter at konkrete lovpålagde vilkår er oppfylte.
Helseopplysningane dine kan ikkje gjerast tilgjengelege for påtalemakta eller til bruk for arbeidsgivarar eller forsikringsselskap sjølv om du samtykkjer.
Lagring av personopplysningane dine i IPLOS
Opplysningar i IPLOS-registeret blir lagra til evig tid.
Før Folkehelseinstituttet får opplysningar om deg i IPLOS, blir dei pseudonymiserte slik at dei ikkje kan sporast direkte tilbake til deg.
Opplysningane blir lagra på eit sikkert område, med tilgangsstyring. Ingen tilsette i IPLOS har tilgang til fødselsnummeret ditt.
Når personopplysningane dine blir utleverte, er pseudonymet ditt bytta ut med eit løpenummer som er prosjektspesifikt og berre gjeld for den aktuelle utleveringa. På denne måten er det ikkje mogleg for mottakaren av data å identifisere deg.