EMCDDA - European Monitoring Centre for Drugs and Drug Addiction
Artikkel
|Oppdatert
EU sitt narkotikaovervakingssenter heiter EMCDDA. Forkortinga står for European Monitoring Centre for Drugs and Drug Addiction. EMCDDA si viktigaste oppgåve er overvaking og analyse av narkotikasituasjonen i Europa. Folkehelseinstituttet er norsk kontaktpunkt for EMCDDA.
- Kvart år bidrar Folkehelseinstituttet med data og informasjon om narkotikasituasjonen i Noreg til EMCCDA.
- Kvart år gjer EMCDDA ut rapporten «The European Drug Report», ei oversikt over narkotikasituasjonen i Europa. Rapporten finst som interaktive nettsider, men også som pdf-fil på fleire språk, blant anna norsk og engelsk.
Folkehelseinstituttet er ansvarleg for oppgåvene Noreg er forplikta til å utføre. Dei viktigaste arbeidsoppgåvene er:
- Ei årleg rapportering om narkotikasituasjonen i Noreg, medrekna statistikk, tiltak og politikk
- Implementering av fem nøkkelindikatorar for harmonisering av data om utbreiing i EU-statane, Noreg og Tyrkia
- Identifisering og tidleg varsling om førekomst av nye narkotiske stoffar i eit Early-warning system
Om EMCDDA
Senteret ligg i Lisboa og blei oppretta i 1993. Oppgåva er å levere objektiv, påliteleg og samanliknbar informasjon om narkotika og narkotikabruk og bruken sine konsekvensar til EU og medlemsstatane. Ved å tilby kunnskapsbasert informasjon bidrar EMCDDA til at avgjerdstakarar, forskarar og spesialistar på området får betre grunnlag til å utforme strategiar og formålstenlege tiltak mot narkotika og narkotikarelaterte problem.
Senteret er organisert med eit styre samansett av representantar for medlemsstatane og EU-kommisjonen. Styret har som hovudoppgåve å utarbeide arbeidsprogram og vedta budsjett. I tillegg har senteret ein eigen vitskapskomité som uttaler seg om vitskaplege spørsmål.
Det er oppretta eit informasjonsnettverk som knyter saman dei 29 nasjonale kontaktpunkta i medlemsstatane (REITOX National Focal Points), og mogeleggjer elektronisk utveksling av data.