Implementering av digitale helseregistre for mor- og barnehelse
Artikkel
|Publisert
Folkehelseinstituttet arbeider med implementering og forsking på digitale helseintervensjonar for å styrkje helsesystem i land med låg og middels inntekt, med særleg fokus på mor- og barnehelse.
I vårt forskingsbaserte arbeid med implementering av digitale helseregister (eRegistries) har svangerskapsomsorga vore eit hovudsatsingsområde. Eit døme på bruk av eRegistries er eHelsekortet for gravide. Når gravide vert registrerte digitalt ved første svangerskapskontroll, vert det oppretta ein individuell, digital svangerskapsjournal som følgjer den gravide gjennom alle vidare svangerskapskontrollar. eHelsekortet lagrar informasjon om den gravide og inneheld mellom anna retningslinjebasert støtte til avgjerder for helsepersonell, som styrkjer kvaliteten på vurderingar og behandlingar.
eRegistries er utvikla i District Health Information Software 2 (DHIS2). Vi driv intervensjonsstudiar, implementeringsforsking og registerbasert epidemiologisk forsking. Implementering og forsking skjer i tett samarbeid med ulike fagmiljø og forskingsgrupper i våre samarbeidsland, og saman med lokale fagmiljø kartlegg vi moglegheiter for å styrkje helsesystem gjennom bruk av eRegistries til ulike føremål.
Til no har vi implementert eRegistries i Palestina og Bangladesh, og har prosjekt på gang i Rwanda, Uganda og Kenya.
Vil du vite meir? Besøk nettsida vår her.